കറുത്തപാട്ടുകേട്ട്
ഭാരതാംബയുടെ
ചെവിടു പൊടിഞ്ഞു
ഉന്മാദ രാഷ്ടീയക്കാരുടെ
അലിംഗനത്തിൽ
അവളുടെ ശ്വാസം നിലക്കാൻ
ഇനി അരനാഴിക നേരം മാത്രം
അഴുക്കുപുരണ്ട തെരുവുകളിൽ
പുറത്തു തൂക്കിയിട്ടിരിക്കുന്ന
തുളകളുള്ള അടിവസ്ത്രത്തിലൂടെ
ഇന്ത്യ ഇതാണെന്ന് സ്ഥാപിക്കുന്നു
ഒരു വെളുമ്പൻ ചാനൽ
സാരിത്തലപ്പുകൊണ്ട്
പാതി മുഖം മറച്ച്
തെരുവോരത്തിരുന്നു
കുട്ടിക്കു മുലയൂട്ടുന്ന
മൂക്കുത്തിയിട്ട പാവം സ്ത്രീ
എന്തായിരിക്കും
അവളുടെ ചിന്തയിൽ ഭാരതം
വിശപ്പൊരവസ്ഥയാകുമ്പോൾ
വിശപ്പിനു വേണ്ടി
സ്ത്രീകൾ വേശ്യകളാവട്ടെ
കുട്ടികൾ വളരുമ്പോൾ
കള്ളന്മാരും കൊലപാതകികളും
ആവട്ടെ
അവർ സ്വന്തം അമ്മയെ
വിൽക്കുന്നവരായി തീരട്ടെ
ആർക്കെന്തു നഷ്ടം ?
മാനാഭിമാനമില്ലാത്ത
അധികാരികൾ ഉപയോഗിച്ച്
ഇസങ്ങളെല്ലാം ജീർണ്ണിച്ചിരിക്കുന്നു
ഇനി ആരു വരും മാതൃരാജ്യത്തെ
രക്ഷിക്കാൻ?
വരൂ രാക്ഷസൻമാരെ
ബലിഷ്ടമായ കൈകൾകൊണ്ട്
ഇവളെ അലിംഗനം ചെയ്യുക
അവളുടെ എല്ലുകൾ
നുറുക്കി കശക്കി എറിയുക
എന്നിട്ട് സ്വസ്ഥമായി ഉറങ്ങുക.